2005-жылдан бери “Хизб ут-Тахрир” уюмуна мүчө болгон жаран андан баш тартты

2005-жылдан бери “Хизб ут-Тахрир” уюмуна мүчө болгон жаран диний экстремисттик уюмдан  баш тартты. Бул тууралуу Улуттук коопсуздук мамлекеттик комитетинин басма сөз кызматы  билдирди.

Маалыматка ылайык, УКМК тарабынан жүргүзүлгөн Кыргыз Республикасындагы диний-экстремисттик жана террористтик уюмдарга каршы аракеттенүү боюнча алдын алуу иш-чаралардын алкагында, “Хизб ут-Тахрир” диний экстремисттик уюмдун (ДЭУ) мүчөлөрүн жана тарапташтарын түшүндүрүү иштери жүргүзүлүүдө.

Профилактикалык иш-чаралардын жыйынтыгында Сузак районунун тургуну Х.А.С. - КР жараны, радикалдык көз карашынан баш тартканын коомчулук алдында билдирди. Х.А.С. 2005-жылдан бери “Хизб ут-Тахрир” ДЭУ кылмыштуу ишмердүүлүктөрүнө катышып, экстремисттик активдүү кызматкерлер менен жашыруун байланышта болгон.

Профилактикалык иш-чаранын жүрүшүндө Х.А.С. тандап алган диний багытынын туура эместигин моюнга алып, жарандарды “Хизб ут-Тахрир” ДЭУ мүчөлөрүнүн мыйзамсыз чакырыктарына алданбоого чакырды.

Азыркы учурда КР УКМК тарабынан “Хизб ут-Тахрир” ДЭУ ишмердүүлүгүн аныктоо жана бөгөт коюу, ошондой эле аталган диний-экстремисттик уюмдун мүчөлөрүнүн арасында профилактикалык иш-чараларды жүргүзүү боюнча иштер улантылууда.