Ала-Букада дүкөндү өрттөөнү уюштурган УКТнын активдүү мүчөсү кармалды

Ала-Бука районундагы дүкөндү өрттөөнү уюштурган, Жалал-Абад облусундагы уюшулган кылмыштуу топтун активдүү мүчөсү кармалды. Бул тууралуу УКМКдан билдиришти.

Атайын кызмат Жалал-Абад облусунун ички иштер башкармалыгы менен биргеликте жүргүзүлгөн иш-чаранын натыйжасында 2011-жылдан бери ИИМдин каттоосунда турган, мурда Ала-Бука районунун "положенци" статусун ээлеп келген жана уюшкан кылмыштуу топтун активдүү мүчөсү А.А.Н. аттуу тургун кармалды.

Такталгандай, аталган А.А.Н. 2025-жылдын 11-январынан тартып Россиянын аймагында болуп, шериктери аркылуу Ала-Бука районунун Өрүктү айылында жайгашкан "Мурас" жана "Мурас 2" азык-түлүк жана курулуш дүкөндөрүн өрттөтүп жиберген. Кылмышты жасоого А.А.Н. менен дүкөндөрдүн ээси Б.З.Т.нын жеке кастык мамилелери негиз болуп, өч алуу максаты болгон. Окуянын кесепетинен келтирилген материалдык чыгымдын көлөмү болжол менен 43 млн сомду түзгөн.

Буга чейин бул фактыга байланыштуу бул өрттү уюштурган Ош облусунун тургундары жана З.А.Т., К.А.Т., Н.у.У. аттуу жарандары жана ошондой эле уюшкан кылмыштуу топтун активдүү мүчөсү катары ИИМдин каттоосунда турган жана ортомчунун ролун аткарып жүргөн Ала-Бука районунун жашоочусу А.Н.З. кармалган.

Азыркы учурда кармалган адамдар УКМКнын убактылуу кармоочу жайына киргизилди, тиешелүү ыкчам-иликтөө иш-чаралары жүргүзүлүүдө.