Шектүү катары күйөөсү кармалды. Баткенде 22 жаштагы келин өлтүрүлгөн

Баткен облусунун Кадамжай районунда муунтулган 22 жаштагы келиндин сөөгү табылды. Бул тууралуу Баткен ОИИБдин маалымат кызматы кабарлап, окуянын чоо-жайын айтты.

Ага ылайык, 2024-жылдын 2-январында саат 15:00дөр чамасында Кадамжай районунун Исхак-Полотхан жалпы дарыгерлер практикалык борборунун тез жардам бөлүмүнүн дарыгери милицияга чалып, көчөдө аял кишинин сөөгү жатканы тууралуу кабарлаган.

Бул иш Кадамжай РИИБдин электрондук журналына катталып, окуя болгон жерге ыкчам-тергөө тобу барып териштирүү жүргүзгөн.

"2-январь күнү Ж.Г. аттуу киши аялы А.К. менен Ирелеш айылынын Садыков көчөсүндө баратып пикир келишпестиктен улам уруша кетишкен. Жыйынтыгында Ж.Г. аялын муунтуп, А.К. ошол жерден көз жумган. Ыкчам-тергөө тобу келиндин сол көзү көгөрүп, мойнунда кол менен муунтулган белгилер бар экенин аныктаган", — деп айтылат кабарда.

Маалым болгондой, көз жумган келиндин да, жолдошунун да кулагы жакшы укчу эмес.

Бул иш боюнча Кылмыш-жаза кодексинин 122-беренесинин 1-бөлүгү ("Адам өлтүрүү") боюнча иш козголуп, кылмышка шектүү катары келиндин жолдошу кармалып, убактылуу кармоо жайына киргизилгени кошумчаланды. Ошондой эле соттук-медициналык экспертиза дайындалган. Азыркы учурда тергөө жүргүзүлүүдө.