Баткенде жаандын кесепетинен 18 бодо мал агып, жолдор жана көпүрөлөр жарактан чыкты

 

Лейлек районунда  12-июль күнү саат 15:00 чамасында кыска мөөнөттүү жамгырдын кесепетинен 18  бодо мал агып кетти. Бул тууралуу Өзгөчө кырдаалдар министрлигинен билдирди.

Маалыматка ылайык, Исфана шаарында 3 турак үйдүн ичине, 3 турак үйдүн жер төлөөсүнө,  короолоруна сел суулары кирген. Раухана тилкесинде 18 бодо малды агызып, Чимген, Мурза-Патча жана Бешбала айылдарында 2020-жылдын “ААжКЖ” иш мерчемдери менен курулган каналдардын жээктерин сел суулары жууп кеткен. Таза суу менен камсыз кылган таза суу түтүкчөлөрүнүн башкы суу бөлүштүргүчүнө сел суулары кирген. Чымген айылында жолго орнотулган 6 даана түтүкчөнү агызган.

Тогуз-Булак айыл аймагынын Тогуз-Булак айылында 2020-жылдын “ААжКЖ” иш мерчемдери менен курулган каналдын жээктерин жана Ош-Баткен-Исфана унаа жолунун 338-чакырымындагы көпүрөнүн сел тосмолорун сел суулары жууп агызып кеткен.

Ошондой эле Баткен районунун Кыштут айыл аймагында 2020-жылдын 12-июль күнү саат 19:00 чамасында кыска мөөнөттүү жамгырдын кесепетинен Кыштут айылында коктулардан келген суулар 7 турак үйдүн ичине жана короолоруна сел суулары кирген. Ички чарбалык унаа жолдорго,  арыктарга кум шагыл тотурган жана 1 ички чарбалык көпүрөнү сел суулары жууп кеткен. Ошондой эле Газ, Согмент айылдарындагы ички чарбалык унаа жолдорунун ар жерин сел суулары жууп кеткен.