Бейшеналиев жаштарды жана мугалимдерди окутуу үчүн келген Тынчтык корпусунун ыктыярчылары менен жолугушту

Бүгүн, 4-августта билим берүү жана илим министри Алмазбек Бейшеналиев Тынчтык корпусунун ыктыярчылары менен жолугушту. Бул тууралуу аталган министрликтин басма сөз кызматынан билдиришти.

Маалыматка ылайык, Кыргызстанга АКШдан Тынчтык корпусу аркылуу 11 директор, 11 мугалим жана 11 ыктыярчы келген.

Министр жолугушууда акыркы 30 жылда 1000ден ашык адам Кыргызстанда Тынчтык Корпусунун ыктыярчылары болуп иштегенин айтты.

“Биздин өлкөгө терең ишеним менен келген ыктыярчыларды жаңы багыттагы ишмердүүлүгү менен куттуктайм. Буга чейин өлкөдө иштеген ыктыярчылардын көптөгөн муундары мугалимдерди окутуу менен жаштарды өнүктүрүү боюнча ийгиликтүү долбоорлорду ишке ашырышты. Ошондой эле жүз миңден ашык адамга англис тилин үйрөнүүгө, башкаруучулук жана лидерлик сапаттарын өнүктүрүүгө, жайылтууга жардам беришти”, - деп билдирди Алмазбек Бейшеналиев.

Белгилей кетсек, Тынчтык Корпусунун ыктыярчылары Кыргызстанда 1992-жылы кол коюлган макулдашуунун негизинде КР өкмөтүнүн чакыруусу боюнча иштешет. Учурда министрлик жана корпус тарабынан ыктыярчылардын санын көбөйтүү боюнча иштер аткарылууда.