Биргелешкен күзөт иштерин жүргүзөт. Чек арада абал туруктуу

Баткен облусунун Баткен районундагы Дахма тилкесинде түн тынч өткөнүн УКМКнын Мамлекеттик чек ара кызматынын басма сөз кызматы билдирди.

2-декабрда саат 9:00гө карата мамлекеттик чек аранын кыргыз-тажик тилкесинде абал туруктуу.

1-декабрда саат 23:30да Баткен районунун Төрт-Көчө тилкесинде Кыргызстан менен Тажикстандын чек ара кызматынын өкүлдөрүнүн, чек арага чектеш райондордун акимдеринин, укук коргоо жана компетенттүү органдардын өкүлдөрүнүн катышуусунда жолугушуусу болуп өттү.

Жолугушууда Баткен районунун саат 21:15те Дахма участкасында — мамлекеттик чек аранын шарттуу сызыгына жакын жерде Тажикстан тараптан белгисиз адамдар 7-8 жолу ок чыгарган окуя талкууланды.

Жолугушуунун жыйынтыгында, коомдук тартипти камсыздоо максатында тараптардын укук коргоо органдары 2021-жылдын 2-декабрынан баштап чек ара тилкесинде биргелешкен күзөт иштерин жүргүзүү чечими кабыл алынды.

Тараптардын чек ара бөлүктөрү кадимки тартипке кызмат өтөөнү улантат.