Бишкекте санитардык талаптарды аткарбаган ишкерлерге 2,5 млн сом айып салынды

Бишкек шаарында санитардык талаптарды аткарбаган ишкерлерге 2,5 млн сом айып пул салынды. Бул тууралуу вице-мэр Татьяна Кузнецова 24-июндагы брифингде билдирди.

Анын айтымында, 14-майдан 23-июнга чейин шаарда көчмө топтор тарабынан 8899 объект текшерилген. Алардын жыйынтыгы боюнча 2 млн 528 миң 500 сомго эреже бузуулар боюнча 1176 протокол түзүлгөн.

“Менчик түрүнө карабай бардык ишкана жана уюмдардын жетекчилери санитардык эрежелерди жана талаптарды аткарышы керек”, - деди ал.

Ал талаптарды аткарбаган ишкана-мекемелердин иши убактылуу токтотуларын эскертип өттү. Учурда шаарда спорттук, мааракелик, майрамдык, массалык иш-чараларды өткөрүгө болбойт.