Бишкекте Дүйнөлүк саламаттык сактоо уюмунун Кыргызстанда онкологиялык ооруларды көзөмөлдөөнү жакшыртуу боюнча миссиясынын алкагында балдар онкологиясы темасына арналган тегерек стол өтүүдө.
Иш-чарада саламаттык сактоо министри Гүлнара Баатырова өзүнүн куттуктоо сөзүн сүйлөп, балдар онкологиясы темасы Кыргызстан үчүн абдан актуалдуу экенин белгиледи.
"Мен биздин көңүлүбүздү теңчилик темасына бургум келет. Диагностикага жетүүдө теңдик, дарылоого жетүүдө теңдик, заманбап жогорку технологиялык жардамга жетүүдө теңдик.
Төмөн жана орто кирешелүү өлкөлөрдө балдардын онкологиясы ресурстардын чектелгендигинен, медициналык инфраструктуранын жетишсиздигинен жана атайын жабдуулардын жана дары-дармектердин жетишсиздигинен улам олуттуу кыйынчылыктарга дуушар болот. Бул диагностиканын жана дарылоонун кечиктирилишине, ошондой эле бейтаптын жашоосунун төмөндөшүнө алып келет.
Рак оорусуна чалдыккан 10 баланын дээрлик 9у төмөн жана орто кирешелүү өлкөлөрдө жашаарын да белгилей кетүү маанилүү. Мындай өлкөлөрдө жашоо көрсөткүчү 30%дан аз болсо, кирешеси жогору өлкөлөрдө 80%га жетет", - деди ал.
Саламаттыкты сактоо министрлигинин башчысы ошондой эле 2022-жылы Кыргызстанда онкологиялык ооруга чалдыккан 180 бала катталганын, ага чейин жыл сайын 120га жакын бала аныкталганын билдирди.
Ошондой эле министр бүгүнкү диагностикалык ыкмаларды, аныктоо куралдарын өркүндөтүү, керебеттердин санын кеңейтүү жана техникалык базаны жакшыртуу боюнча активдүү иштер жүрүп жатканын, дары-дармектерди ачык пландаштырууну жана бөлүштүрүүнү камсыз кылуу үчүн онкологиялык пациенттердин санариптик реестри түзүлөрүн белгиледи.
Пикирлер (0)
Пикир жок. Сиз биринчилерден болушуңуз мүмкүн