Свердлов райондук ички иштер башкармалыгынын кызматкерлери алдамчылыкка шектелген жаранды кармашты. Бул тууралуу аталган мекеменин басма сөз кызматы билдирди.
25-октябрда жаран «А» аттуу кыздын үстүнөн милицияга арыз менен кайрылган. Ал 7-июнь күнү соода борборлорунун биринде аны 143 миң сомго бөлүп-бөлүп төлөө менен iPhone 14 уюлдук телефонун сатып алууга көндүргөн. Ошол эле учурда ал насыяны өзү төлөп берем деп убада берген.
Бул фактынын негизинде Свердлов РИИБнин тергөө кызматы тарабынан КР Кылмыш-жаза кодексинин 209-беренеси (Алдамчылык) боюнча кылмыш иши козголду.
Ыкчам иликтөө кызматкерлери кылмышка шектүү катары 1998-жылы туулган Д.А. аттуу кызды кармашкан. Ал убактылуу кармоочу жайга киргизилген.
Милиция шектүүнүн кылмыштуу аракеттеринен жапа чеккен жана кандайдыр бир маалыматы бар жарандарды 0500-99-66-15, 0700-39-04-53, 0708-87-71-11 же 102 телефондоруна чалууну өтүнөт.
Пикирлер (0)
Пикир жок. Сиз биринчилерден болушуңуз мүмкүн