Мамлекеттик бюджетке 6 миллиард 417,8 миллион сом салык түшпөй калды

2020-жылдын 7 айында бюджет 4 миллиард 489,6 миллион сомго кем аткарылды. Бул тууралуу Мамлекеттик салык кызматынын төрагасы Кабыл Абдалиев брифингде билдирди.

“2020-жылдын июль айында Мамлекеттик салык кызматы тарабынан 6 миллиард 859,1 миллион сом суммасында салыктар жана төлөмдөр жыйналган. Белгиленген план 109,9 % пайызды түзгөн же 616,1 миллион сомго ашыгы менен аткарылган. Өткөн жылдын ушул мезгилине салыштырмалуу салыктардын жана төлөмдөрдүн келип түшүүсү 548,9 миллион сомго көбөйгөн", - деди Кабыл Абдалиев.

Ошону менен бирге ушул жылдын 7 айында 40 миллиард 452,3 миллион сом салык жыйналган (болжол 44 941,9 миллион сом), план 90% пайызды түзгөн же 4 миллиард 489,6 миллион сомго кем аткарылган.

Белгилей кетсек, январь-февраль айларында салыктарды чогултуу белгиленген пландын алкагында аткарылган, бирок коронавирустук карантинге байланыштуу үстүбүздөгү жылдын 5 айынын жыйынтыгы боюнча мамлекеттик бюджетке 6 миллиард 417,8 миллионн сом, ал эми республикалык бюджетке – 5 миллиард 438,3 миллион сом түшпөй калган.

Акыркы эки айдын ичинде өлкөдөгү эпидемиологиялык кырдаалга карабастан мамлекеттик бюджет боюнча артта калуулар 2 миллиард сомго, ал эми республикалык бюджет боюнча 1,9 миллиард сомго кыскартылган.