Депутат окуу мезгилин адаттагыдай 1-сентябрдан баштоону сунуштады

Бүгүн, 6-июнда Жогорку Кеңештин социалдык саясат боюнча комитетинин жыйынында депутат Аида Исатбек кызы окуу мезгилин адаттагыдай эле 1-сентябрдан баштоону сунуштады.

Анын айтымында, азыркы учурда күн ысып кеткендигине байланыштуу окуучулар чарчап, кабыл алуу жөндөмү жок болууда.

"Белгилүү болгондой быйыл окуучулар менен студенттер 8-июнга чейин окуйт. Биздин мектептерде 40-50 бала окуйт.

Күн ысып кеткендигине байланыштуу алар чарчап, билим алуунун натыйжасы болбойт.

Ошондуктан кийинки окуу жылын адаттагыдай 1-сентябрдан башташ керек",- деди депутат.

Билим берүү министрлигинин өкүлү бул маселе боюнча ата-энелер да көптөгөн арыз менен кайрылып жатканын билдирип, министрлик маселени карап чыгып жообун жарыялай турганын кошумчалады.