Эки күндүк иш бир күндө бүтүрүлдү. Бишкекте муздак суу берүү толугу менен калыбына келтирилди

Бишкекте суу берүү толугу менен калыбына келтирилди. Бул тууралуу шаардык мэриядан билдиришти.

Маалыматка ылайык, "Бишкексууканалдын" командасы "Көк-Жар" суу алгычында эки күнгө пландалган чоң көлөмдөгү иштерди бир күн ичинде бүткөрдү.

"Ошентип, резервуарлар дезинфекцияланып, шаардык суу түтүктөрүндө керектүү оңдоо иштери жүргүзүлдү. Бул иш-чаралардын натыйжасында ичүүчү суунун оптималдуу сапаты жана суу менен камсыздоо тутумунун ишенимдүү иштеши камсыз кылынат", -деп айтылат маалыматта .

Мэриядан белгилешкендей, аткарылган иштердин жыйынтыгында бүгүн, 12-июлда эртең менен шаардын бардык аймагына, анын ичинде Арча-Бешик конушуна таза суу туруктуу бериле баштады.

Эскерте кетсек, буга чейин мэрия 11-июль саат 08:00дөн 13-июль саат 08:00гө чейин Фрунзе – Аламүдүн дарыясы – темир жол линиясы – Панфилов көчөсү менен чектешкен аймакта суу өчүрүлөрүн маалымдаган.

Суу берүү алдыдагы күз-кыш мезгилине байланыштуу “Көк-Жар” суу алгычында профилактикалык иштерди жүргүзүүгө байланыштуу токтотулган.