MCN Coin виртуалдык активи мамлекеттик каттоодон өткөн эмес жана Кыргызстанда уруксат берилген виртуалдык активдердин реестринде да жок. Бул тууралуу Финансы рыногун жөнгө салуу жана көзөмөлдөө кызматы билдирди.
Маалым болгондой, 2024-жылдын март айынан бери “Бирик Туран” ЖЧКсы MCN Coin 12 миллион сомго каттоо үчүн Мамлекеттик каржы көзөмөл органына бир нече жолу кайрылган. Бирок мыйзам талаптары сакталбагандыктан каттоодон баш тартылган.
“MCN Coin Виртуалдык активдердин бирдиктүү мамлекеттик реестринде катталган эмес. Кыргызстандын лицензияланган криптобиржаларында да жок. Лотереяларды же башка дем берүүчү иш-чараларды өткөрүүгө уруксат берилген эмес”, — деди ведомство.
20-январда MCN Coin боюнча бардык материалдар юридикалык баа берүү үчүн Улуттук коопсуздук боюнча мамлекеттик комитетке өткөрүлүп берилген.
Финансы рыногун жөнгө салуу жана көзөмөлдөө кызматы жарандар кандайдыр бир каржылык компанияга инвестиция салуудан мурун алардын мыйзамдуулугун текшерүүнү эскертет.
Буга чейин Жогорку Кеңеш бийликти MCN Coin криптовалютасына каршы күрөшүүгө чакырган.
Ал эми ЖМКлар бул иш боюнча бир нече адам кармалганын жазып чыгышкан.
Пикирлер (0)
Пикир жок. Сиз биринчилерден болушуңуз мүмкүн