ИИМ таза шайлоо өткөрүү үчүн чагымчыл маалыматтарга ишенбөөгө чакырды

Жогорку Кеңештин депутаттарын шайлоодо коомдук тартипти сактоо тиешелүү деңгээлде жүргүзүлөт. Бул тууралуу Ички иштер министрлигинин басма сөз кызматы билдирет.

Маалым болгондой, ЖК депутаттарын шайлоого даярдануу жана өткөрүү учурунда коомдук коопсуздукту жана мыйзамдуулукту сактоо үчүн ИИМдин «Кыргыз Республикасынын Жогорку Кеӊештин депутаттарын шайлоого даярдык көрүүдө жана шайлоо учурунда коомдук тартипти жана коопсуздукту камсыздоо чаралары жөнүндө» буйругу чыккан.

Аны менен катар парламенттик шайлоого даярдык көрүүдө жана шайлоо учурунда коомдук тартипти жана коопсуздукту камсыздоо иш-чаралары боюнча Комплекстүү иш-мерчем иштелип чыкты.

Аталган иш-мерчемде шайлоого даярдануу жана өткөрүү мезгилинде мыйзамдуулукту, жарандардын укуктарын жана эркиндиктерин камсыздоо, коомдук тартипти сактоо, шайлоо участокторун шаймандары менен кайтаруу, шайлоо участокторуна шайлоо бюллетендерин ташуу жана жеткирүү коопсуздугун камсыздоодо тиешелүү чараларды көрүү боюнча уюштуруу иштери каралган.

Ошондой эле, жүктөлгөн милдеттерди натыйжалуу аткаруу үчүн ИИМдин Ыкчам штабы түзүлүп, шайлоого даярдык көрүү жана өткөрүү учурунда коомдук тартипти жана коопсуздукту камсыздоо үчүн ИИОнун күчтөрү менен каражаттары эсептелди.

КР Жогорку Кеӊешинин депутаттарын шайлоого даярдык көрүү жана өткөрүү учурунда коомдук тартипти жана коопсуздукту камсыздоо жана алдын ала түзүлгөн күч-каражаттын эсебине ылайык, ИИМден тиешелүү деңгээлде кызматкерлер тартылат.

"ИИМ Кыргыз Республикасынын жарандарынын арасында коомдук тынчсыздандырууга алып келген жалган маалыматтарды тараткандарды аныктоо үчүн жалпыга маалымдоо каражаттарына, социалдык тармактарга жана телерадио жыштыгына күн сайын мониторинг жүргүзүп жатат. Коомдук тартипти жана коопсуздукту бузууга алып келе турган жалган маалыматтарды таратып, коомдук тартипти бузгандарга карата чаралар көрүлөт.

Ушуга байланыштуу айрым жарандар социалдык тармактарда тараткан чагымчыл материалдарга ишенбөөгө чакырат. Ички иштер министрлиги чагымчыл материалдарды тараткандарды тактоо боюнча иштерди жүргүзүүдө", - деп айтылат маалыматта.

Ички иштер министрлиги жарандарга кайрылып месенджерлердеги, социалдык тармактардагы чагымчыл, жалган материалдарды таратуудан алыс болууга чакырат жана мындай фактылар боюнча ички иштер органдарына "102" телефон номуру аркылуу кабарлап коюну суранат. Мыйзамды билбегендик кылмыш жоопкерчилигинен бошотпойт жана чагымчыл билдирүүлөрдү таратканга тиешеси барлар жоопкерчиликке тартылат.

Ошондой эле Ички иштер министрлиги жарандарды жалган маалыматтарды таратуудан жана чагымчылдыкка алдырбоого чакырат.

Ички иштер министрлиги саясий маселелерге катышпайт, бардык жарандарга жана партияларга бирдей мамиле кылат, кырдаалды туруксуздаштырууга жол бербейт, бирок укуктук тартиптин бузулушу боюнча фактылар орун ала турган болсо анда ал фактылар катталып, мыйзам чегинде коомдук тартипти бузгандарга чара көрөт.

Жалпысынан белгилегенде Ички иштер министрлиги шайлоо боюнча иш-чараларды өткөрүүдө чоң тажрыйбага ээ болгонун жана алдыдагы шайлоону өткөрүүдө коомдук тартипти жана коопсуздукту жогорку деӊгээлде камсыздоого даяр экендигин билдирет.