Ушул жылдын апрель, май айларындагы карантин учурунда Кыргызстанга беш мамлекеттен вирус кирген. Бул боюнча Саламаттыкты сактоо министрлигинин оорулардын алдын алуу жана санитардык-эпидемиологиялык көзөмөл департаментинин лабораториялык сыноолор борборунун башчысы Айгүл Жумаканова билдирди.
Анын айтымында, Россиядагы керектөөчүлөрдүн укугун коргоо жана адамдык бакубатчылык боюнча федералдык кызматынын (Роспотребнадзор) “Вектор” референс-лабораториясында жүргүзүлгөн изилдөөлөрдүн жыйынтыгы чыкты.
"2020-жылы 25-майда карантин учурунда ордо калаадагы клиникалык жугуштуу оорулар бейтапканасына түшкөн жарандардан алынып, коронавирус инфекциясына оң жыйынтык көрсөткөн 20 даана биоматериалды топтоп, Россиядагы “Вектор” референс-лабораториясына жибердик. Бул изилдөөнүн максаты – Кыргызстандагы вирустун таржымалын аныктоо болчу. Илимий изилдөөнүн жыйынтыктарына ылайык, кайсы мамлекеттен Кыргызстанга вирус киргени аныкталды. Алар үч топко бөлүнөт:
1) Швеция, Россия Федерациясы.
2) Швеция, АКШ, Бириккен Араб Эмираттары.
3) Оман мамлекети.
Ушул мамлекеттерден келген геном Кыргызстанда басымдуулук кылаары аныкталды", - деди Айгүл Жумаканова.
Эң кызыгы таажы вирусунун мекени – коңшу Кытайда байкалган геном Кыргызстанда карантиндик эрежелер сакталган учурда аныкталбаганын Айгүл Жумаканова белгиледи.
Пикирлер (0)
Пикир жок. Сиз биринчилерден болушуңуз мүмкүн