Кытай-Кыргызстан-Өзбекстан темир жолунун курулушун тездетүү маселеси талкууланды

Президент Садыр Жапаров бүгүн Шанхай кызматташтык уюмунун (ШКУ) башкы катчысы Чжан Минди кабыл алды.

ШКУнун алкагында өз ара аракеттенүүнүн артыкчылыктуу багыттары, Уюмга мүчө-өлкөлөрдүн аймактык коопсуздукту камсыз кылуу, соода-экономикалык жана маданий-гуманитардык чөйрөлөрдөгү кызматташтыгын мындан ары өнүктүрүү боюнча пикир алмашуу болду.

Президент Садыр Жапаров ШКУнун Эл аралык Ысык-Көл марафонуна колдоо көрсөтүп, катышкандыгы үчүн ыраазычылык билдирип, мындай спорттук иш-чараларды өткөрүү элдердин ортосундагы достукту жана өз ара түшүнүшүүнү тереңдетүүгө, ошондой эле ШКУнун эл аралык аренада позициясын көрсөтүүгө чоң салым кошуп жатканын баса белгиледи.

Мамлекет башчысы Кыргызстан ШКУга катышуусуна өзгөчө маани берерин жана Уюмга мүчө мамлекеттер менен өз ара аракеттенүүнүн бардык чөйрөлөрүндө мындан ары да кызматташууну тереңдетүүгө даяр экенин белгиледи.

Кыргыз тарап ШКУнун алкагында абдан талап кылынган жана маанилүү сунуштарды жүйөлүү жана негиздүү илгерилетүүдө. Тактап айтканда, аймактык коопсуздукту камсыз кылуу, терроризм, экстремизм, баңги заттарды мыйзамсыз жүгүртүү жана транс чек аралык уюшкан кылмыштуулук менен күрөшүү максатында Бишкек шаарында Эл аралык уюшкан кылмыштуулукка каршы күрөшүү борборун түзүү иштерин аягына чыгаруу зарыл.

Ал кыргыз тарап бул Борборду түзүү маселесин талкуулоо үчүн ШКУга мүчө-мамлекеттердин ведомстволор аралык делегацияларынын консультацияларын уюштуруунун үстүндө иштеп жатканын баса белгиледи.

Ошону менен бирге Садыр Жапаров киберкоопсуздукту камсыздоо боюнча биргелешкен чараларды күчөтүүнү, ошондой эле эл аралык маалыматтык коопсуздук чөйрөсүндө кабыл алынган документтерди практика жүзүндө ишке ашырууну белгиледи. ШКУнун алкагында кызматташуунун негизги артыкчылыктары катары Кыргызстан бардык жетишилген макулдашууларды, ошондой эле кол коюлган документтерди практика жүзүндө ишке ашырууну карайт.

Мындан тышкары, мамлекет башчысы натыйжалуу финансылык механизмдерди түзүү процессин улантуунун маанилүүлүгүн белгиледи, атап айтканда, сөз экономикалык долбоорлорду ишке ашыруу максатында ШКУнун өнүктүрүү банкын жана ШКУнун өнүктүрүү фондун түзүү жөнүндө болуп жатат. Ошондой эле транспорттун бардык түрлөрү менен ташуунун сапатын жогорулатуу боюнча биргелешкен иштерди улантуу зарыл. Бул багытта “Кытай-Кыргызстан-Өзбекстан” темир жолун куруу долбоорун тез арада практикалык ишке ашыруу абдан маанилүү деп эсептелинет.

ШКУну реформалоо маселесине токтолуп, президент ШКУга мүчө-мамлекеттердин башчыларынын Кеңешинин “ШКУнун ишмердүүлүгүн өркүндөтүү жөнүндө” чечимин ишке ашыруу максатында Уюмга мүчө-мамлекеттер тарабынан Уюмду андан ары реформалоо сунуштарын иштеп чыгууга киришкендигин белгиледи.

«Кыргыз тарап да бул процессти колдойт жана биздин Уюмду ар тараптуу өркүндөтүү боюнча зарыл иштерди кылдат изилдеп, биргелешип жүргүзүүнү маанилүү деп эсептейт», - деп баса белгиледи Садыр Жапаров.

Өз кезегинде ШКУнун башкы катчысы Чжан Мин кыргыз тарапка жылуу кабыл алуу жана эл аралык спорттук аренада абдан популярдуу болгон ШКУнун Эл аралык Ысык-Көл марафонуна катышуу мүмкүнчүлүгү үчүн ыраазычылык билдирди.

Чжан Мин ошондой эле мамлекет башчысына ШКУнун Катчылыгынын жүргүзүп жаткан иштери, ШКУнун алкагында бардык тармактар боюнча өз ара аракеттенүүнүн абалы жөнүндө ар тараптуу маалымат берди.

ШКУнун башкы катчысы президент Садыр Жапаровдун жетекчилиги астында Кыргыз Республикасынын Уюмдун ишмердүүлүгүнө карата мамилесин жогору баалады, бул ШКУнун алкагындагы тилектештиктин, биримдиктин жана ынтымактын жогорку даражасы болуп саналат. Ал белгилегендей, Кыргызстан түрдүү программаларга активдүү катышып, Уюмдун өнүгүшүнө көмөк көрсөтүүгө чоң салым кошуп келет.

Ошону менен бирге Чжан Мин Катчылык ШКУга мүчө мамлекеттердин башчыларынын чечимдерин ишке ашырууга көмөктөшүү жана координациялоо боюнча аракеттерин уланта бере тургандыгына ишендирди.

Тараптар ШКУнун ишмердүүлүгүнүн бардык негизги аспектилери жана анын келечектүү багыттары боюнча ШКУнун алкагында жемиштүү кызматташууну мындан ары да чыңдоого үмүт артышты.