Көчөдө турган унаадан 210 миң сом уурдаган жаран кармалды

Бишкек шаарында Биринчи май РИИБдин участкалык инспекторлору уурулукка шектелген адамды кармашты.

Аталган түзүмдүн басма сөз кызматынын маалыматы боюнча, 17-майда милицияга Д.О. аттуу жаран арыз менен кайрылып, саат 15:30 чамасында Патрис Лумумба көчөсүндө токтоп турган «  Mercedes-Benz Sprinter» үлгүсүндөгү унаадан 210 миң сом уурдап кеткен белгисиз адамга чара көрүүнү өтүнгөн.

Жазык кодексинин 200-беренеси менен (Уурдоо) сотко чейинки өндүрүш иши башталган.

Тергөө жана издөө иштеринин алкагында №5 шаардык милиция бөлүмчөсүнүн кызматкерлери шектүүнү аныкташты. Ал 1973-жылы туулган О.Ж. экени белгилүү болду. Шектүү Бишкек ШИИББдин убактылуу кармоочу жайына киргизилди.

Учурда шектүүнүн мындан башка дагы кылмыштарга тиешеси бар же жок экендиги текшерилүүдө.