Күйүүчү майдын орточо баасы 43,5 сомду түзүүдө

Күйүүчү-майлоочу майлар боюнча 40,6 миң тонна дизелдик отун жазгы айдап себүү иштери үчүн керек болуп жатат, деп билдирди биринчи вице-премьер-министр, ыкчам штабдын жетекчиси Кубатбек Боронов бүгүн, 14-апрелде Жогорку Кеңештин комитеттеринин биргелешкен жыйынында.

Анын айтымында, учурда күйүүчү майдын 32,4 миң тоннасы же 80 пайызы даяр. Майдын орточо баасы 43,5 сомду түзүүдө.

“Учурда Айыл чарба, тамак-аш өнөр жайы жана мелиорация министрлиги Нефтетрейдерлер ассоциациясы менен биргеликте сүйлөшүүлөдү жүргүзүп, тиешелүү макулдашууларга кол койгон. Учурда абал туруктуу, жетишсиз жагдайлар түзүлбөйт деп ойлойм” , - деди Боронов.

Минералдык жер семирткичтерди январь айынан майга чейин ташып келүү графиги түзүлгөн, азыр 65,3 миң тонна минералдык жер семирткичтери даяр. Учурда баасы 4 сомго кымбаттады. 250 миң даана айыл чарба техникалары ишке берилет, 90 МТЗ иш алып барууга даяр. Тетиктерди иштетүү жана сатуу боюнча базарларды уюштуруп жатабыз, деп кошумчалады ал.