Мамкурулуш "KG Групп" курулуш компаниясынын лицензиясын жокко чыгаруу маселесин карап жатат

Мамкурулуш "KG Групп" курулуш компаниясынын лицензиясын жокко чыгаруу маселесин карап жатат. Бул тууралуу аталган бөлүмдүн башчысы Нурдан Орунтаев Биринчи радионун түз эфиринде билдирди.

Анын айтымында, учурда тиешелүү иштер жүргүзүлүүдө. “KG Групп” курулуш компаниясынын лицензиясын жокко чыгаруу маселесин кароого аргасыз экенибизди ачык айтып жатабыз. Жакынкы убакта бул маселе боюнча маалымат берүүгө аракет кылабыз", - деди Орунтаев.

Ал белгилегендей, "KG Групптун" Бишкекте тогуз объекти бар. Алардын үчөө курулуп, пайдаланууга берилген, калгандары курулуп жаткан объектилердин реестринде, бирок иш жүзүндө эл жашайт.

«KG Групп жарандарга кайдыгер мамиле жасап жатат. Акча алып, милдетин аягына чейин аткарышпайт. Имамидин Ташов патриотмун дейт. Андай болсо, анда эмне үчүн Көк-Жардан 20 сотых жерди бала бакча куруу үчүн алып, ал жерге чындыгында үй салган.

Азыр ал телефондо: "Мен сонун бизнесменмин, мен муну кылдым, тигини кылдым" дейт. Катуу бизнесмен болсо үйлөрдү куруп бүтүшү керек болчу. Бирок жөн эле отуруп алып сүйлөгөнү туура эмес деп эсептейм», - деди Мамкурулуштун жетекчиси.

Ошондой эле, Нурдан Орунтаевдин айтымында, "KG Групптун" жарандар жашаган бир мыйзамсыз объектиси бар.

«Биз курулуш компаниясынын ишине кийлигишпейбиз. Алардын куруп жатканы жакшы. Турак-жай фондусун кеңейтүү керек. Бирок бул мыйзамдуу түрдө жасалышы керек”, - деп жыйынтыктады чиновник.

Эскерте кетсек, буга чейин УКМКнын имаратына "KG Групптан" үй алгандар келишкен. Алар бир нече жыл мурун сатып алган батирлерин ала албай жатканын айтышкан.

Учурда «KG Групп» курулуш компаниясынын жетекчиси Имамидин Ташовго кылмыш иши козголду. Ал бийликти күч менен басып алууга аракет кылган деп шектелүүдө. Ал изделүүдө.