Мэр Бишкекте электр энергиясын үнөмдөө боюнча түшүндүрүү иштерин жүргүзүүнү талап кылды

Бишкек шаарынын мэри шаардык кызматтардан маселелерди олуттуу кароону талап кылды. Бул тууралуу мэриянын басма сөз кызматы маалымдады.

Калаа башчсы Айбек Жунушалиевдин райондук администрациялардын башчылары, шаардык кызматтардын жана түзүмдүк бөлүмдөрдүн жетекчилери менен кезектеги пландык жыйыны өттү.

Жыйындын катышуучулары эсепке алынбаган муниципалдык менчикти жана жер тилкелерин инвентаризациялоо жана идентификациялоо, электр энергиясын керектөө лимиттерин сактоо боюнча чаралар ж.б. маселелерди талкуулашты.

Жыйынтыгында Айбек Жунушалиев муниципалдык менчикти инвентаризациялоо боюнча тапшырмалар туура эмес аткарылып жатканын айтып, аткарылган иштердин жыйынтыгына сапаттуу анализ берүүнү талап кылды, антпесе бул иш канааттандырарлык эмес деп табылат.

Жер ижарага алгандардын карыздарын аныктоо үчүн район акимдерине учурдагы мыйзамдын алкагында карызкорлорго карата комплекстүү чараларды көрүү тапшырылды.

Ошондой эле, райондордун жетекчилери «Түндүк электр» ААК менен биргеликте электр энергиясын керектөө лимиттерин сактоо боюнча шаардыктар менен түшүндүрүү иштерин күчөтүшү керек.

Пландык жыйындын аягында мэр бардык кызматтардын жана ишканалардын жетекчилерине кийинки жолугушууга чейин өз ишинин сапаттуу жыйынтыктарын беришпесе, тийиштүү дисциплинардык чаралар көрүлөрүн эскертти. Ал ошондой эле жолугушуунун күн тартибиндеги маселелерди олуттуу иштеп чыгууну талап кылды.