Москва районунда өзүнүн таанышын өлтүрүүгө шектелип аял кармалды

Москва районунда өткөн жылы киши колдуу болуп өлтүрүлгөн адамдын өлүмүнө шектелип аял кармалды. Бул тууралуу Чүй ОИИББнын басма сөз кызматы билдирди.

2021-жылдын 21-март күнү саат 16:30дар чамасында Москва районунун ички иштер бөлүмүнө Беловодское айылында жайгашкан үйлөрдүн биринен эркек кишинин сөөгү табылгандыгы тууралуу билдирүү келип түшкөн.

Окуя болгон жерге тергөө-ыкчам тобу чыгышып, айтылган үйдөн 1969-жылы туулган Т.М. аттуу жарандын киши колдуу болуп өлгөн жансыз денеси табылган (бычактан жаракат алган).  

Аталган факт Кылмыш-жаза кодексинин 130-беренеси (Адам өлтүрүү) боюнча КЖБР катталган.

Чүй облусунун ички иштер башкы башкармалыгынын Криминалдык милиция кызматынын кызматкерлери жана Москва районунун ИИБнүн Криминалдык милиция кызматынын кызматкерлери тарабынан көрүлгөн ыкчам-издөө иш-чараларынын жүрүшүндө, бул кылмышка шектүү катары 1980-жылы туулган А.Ж. аттуу аял киши кармалган.

Тергөөнүн алдын ала версиясы боюнча кылмышка шектүү деп кармалган адам, өлтүрүлгөн адам экөөнүн ортосундагы мас абалда чыр-чатактан келип чыкканы маалым болгон.

Учурда шектүү Москва районунун ИИБнүн убактылуу кармоочу жайына киргизилди. Сотко чейинки өндүрүш иши уланууда.