Ош шаарында журналист айым Жол кыймылынын коопсуздугун камсыздоо башкы башкармалыгынын кызматкеринин айтканын укпай, унаасы менен бир нече метрге сүйрөп кеткен. Бул тууралуу аталган мекемеден тастыкташты.
Ага чейин окуя тууралуу видеону жалпыга маалымдоо каражаттарынын бири жарыялаган болчу.
“Журналист Жылдыз Бекбаева унаасын туура эмес жерге токтоткон. Мындан улам биздин кызматкер протокол толтуруу үчүн документтерин сураганда, журналист айым тийиштүү кагаздарды көрсөтпөй кыйкырып баштаган. Жол эрежесин бузган айым кетүүнү көздөгөндө, инспектор алдын тоскон, бирок ага карабастан кызматкерди унаанын капотуна жаткызып бир нече метрге чейин айдап кеткен”, - деп жазылат облустук ЖКККБнын берген маалыматында.
Маалыматка караганда жол инспектору Ош шаардык милициясына арызы менен кайрылган, учурда тергөө иштери жүрүп жатат.
Ошондой эле, Жылдыз Бекбаева Ош шаардык кеңешине “Эмгек” партиясынан талапкер экени айтылат.
Пикирлер (3)