Президент Европа Биримдигинин Борбор Азиядагы атайын өкүлүнө Тажикстандын кол салуусу тууралуу айтып берди

 Президент Садыр Жапаров бүгүн, 10-октябрда, Европа Биримдигинин Борбор Азиядагы атайын өкүлү Тери Хакаланы кабыл алды. Бул тууралуу президенттин басма сөз кызматынан кабарлашты.

Тараптар эки тараптуу өз ара аракеттенүүнү активдештирүү, сапар алмашуу жана Кыргызстан менен ЕБ ортосунда Кеӊейтилген өнөктөштүк жана кызматташтык боюнча келишимге кол коюу маселелерин талкуулап, глобалдык күн тартибиндеги кеңири чөйрөдөгү, анын ичинде регионалдык коопсуздуктун маселелери боюнча пикир алмашты.

Мамлекет башчысы быйыл 30 жыл толуп жаткан Европа Биримдиги менен эки тараптуу кызматташтык ийгиликтүү өнүгүп жатканын канааттануу менен белгиледи. Бүгүнкү күндө Европа Биримдиги Кыргызстан үчүн маанилүү жана артыкчылыктуу тышкы саясат өнөктөшү бойдон калууда жана кыргыз тарап бул кызматташтыкты өнүктүрүүгө даяр.

Баарлашуунун жүрүшүндө президент Садыр Жапаров Баткен облусунда карапайым калктын жана аскер кызматкерлеринин өлүмүнө, жарандык жана социалдык инфраструктуранын талкаланышына алып келген Тажикстандын Кыргызстанга каршы куралдуу агрессиясы тууралуу айтып берди.

Өз кезегинде атайын өкүл Чолпон-Ата шаарында болуп өткөн Борбор Азия мамлекеттеринин башчыларынын Төртүнчү консультативдик жолугушуусунун актуалдуулугун белгилеп, учурда дүйнөдө болуп жаткан турбуленттик мезгилде Борбор Азия өлкөлөрүнүн бүтүндүгүн сактоо маанилүү экенин белгиледи.

Европа Биримдигинин Борбор Азиядагы атайын өкүлү Тери Хакала кыргыз-тажик мамлекеттик чек арасындагы соңку кайгылуу окуяларга байланыштуу көңүл айтты. Ал Кыргызстандын жапа чеккен аймактарына ЕБ тарабынан гуманитардык жардам бөлүнгөнү тууралуу маалымат берип, ошондой эле чек ара маселелерин тез арада жөнгө салууга көмөк көрсөтүүгө даяр экенин билдирди.