Прокуратура Чолпон-Ата шаарындагы паркты курууда мамлекетке зыян келтирилгенин аныктады

Прокуратура Чолпон-Ата шаарында паркты курууда мамлекетке зыян келтирилгенин аныктады. Бул тууралуу Башкы прокуратуранын басма сөз кызматы билдирди.

Ысык-Көл райондук прокуратурасы тарабынан Ысык-Көл областынын өнүктүрүү фондунун дирекциясынан «Чолпон-Ата шаарындагы паркты көрктөндүрүү жана жашылдандыруу» долбооруна бөлүнгөн каражаттардын максаттуу пайдаланылышы боюнча текшерүү жүргүзүлдү.

Текшерүүдө, Чолпон-Ата шаардык мэриясынын жана Өнүктүрүү фондунун кызматкерлери жогоруда аталган долбоорду аткарууда кызмат абалынан кыянаттык менен пайдаланышып, иш жүзүндө аткарылбаган жумуштардын көлөмүн жогорулатуу менен мамлекетке 720 миң сомдук зыян келтиришкендиги аныкталган.

Бул факт боюнча райондук прокуратура тарабынан Кылмыш-жаза кодексинин 337-беренеси (“Кызмат абалынан кыянаттык менен пайдалануу”) менен кылмыш иш козголуп, тергөө амалдары жүргүзүлүүдө.