Соңку жуманын ичинде Россиядан Кыргызстанга 4 миңге жакын жаран кайтып келди

 

10-августан 17-августка чейин Россиядан 20 чартердик авиакаттамдар менен 3 915 кыргыз жарандары мекенине кайтарылды. Бул тууралуу аталган өлкөдөгү Элчиликтин басма сөз кызматынан билдиришти.

Маалыматка ылайык,  Москвадан 7, Екатеринбургдан 5, Новосибирсктен 4, Санкт-Петербургдан 4 каттам учуп келген.

Алардын толук тизмеси:

- 7 авиакаттам Москва шаарынан Бишкек жана Ош шаарларына 1 687 жургунчүлөр менен;

- 4 авиакаттам Новосибирск шаарынан Бишкек жана Ош шаарларына 688 жургунчүлөр менен;

- 5 авиакаттам Екатеринбург шаарынан Бишкек жана Ош шаарларына 903 жургунчүлөр менен;

- 4 авиакаттам Санкт-Петербург шаарынан Бишкек жана Ош шаарларына 637 жургунчүлөр менен.

Маалыматка таянсак, 20-марттан тартып 17-августка чейин Россиянын 21 аймагынан 30 656 кыргызстандык кайтты. Россиядан 121 авиакаттамдар жана Казакстандын аймагы аркылуу Оренбург жана Самара облустарынан 95 автобус уюштурулган.