Тажик аскерлери тарабынан кармалган кыргыз жараны коё берилди

Тажик аскерлери тарабынан кармалган  кыргыз жараны Кубанычбек Акматов коё берилди. Бул тууралуу Баткен районунун акими "Азаттык" радиосуна билдирди.

Маалым болгондой, Кубанычбек Акматов азыркы учурда өзүнүн үйүндө.

Тажикстандын коопсуздук кызматкерлери 6-сентябрда Баткен районунун Үч-Дөбө айылынын тургуну, сегиз баланын атасы Кубанычбек Акматовду кармап кеткен. Кармоо учурунда жанынан болжол менен 100 кг ферула чөбү табылганы айтылган.

Кыргызстандын Чек ара кызматы Акматов Үч-Дөбө айылы тарапка дары чөп чогултуп барганын, аны транзит жолдон кармап кетишкенин жана тажик жарандарына мыйзамсыз чөп сатууга аракет кылган деген айып коюшканын маалымдаган.