УКМК Жогорку Кеңештин дагы бир депутатынын мыйзамсыз байыганын аныктады. Бул тууралуу УКМКнын басма сөз кызматы билдирди.
Маалым болгондой, депутат А.М.А. саясий ишмердүүлүгүнүн жүрүшүндө ал кымбат баалуу кыймылдуу жана кыймылсыз мүлккө ээ болгон, анын жалпы наркы расмий кирешесинен бир нече эсе жогору. Ошол эле учурда, ал өзүнүн көмүскө мүлкүн жашыруу үчүн, аны жакын туугандарына жана кирешеси расмий тастыкталбаган адамдарга каттаткан. Тактап айтканда, соода жана көңүл ачуу комплекси, Бишкек шаарынын жана Ысык-Көл облусунун аймагында жайгашкан 14 жер тилкеси, 3 кеңсе жана 4 турак эмес жай, 5 батир, "Каприз" борборундагы коттедж, 3 жеке турак жай, жана 5 унаа. Бул активдердин жалпы орточо базар наркы 1,5 миллиард сомдон ашкан.
А.М.А. 2008-2020-жылдар аралыгында Бишкек шаардык кеңешиндеги жана Жогорку Кеңештеги саясий таасирин пайдалануу менен активдерин кыйла көбөйткөн.
Учурда А.М.Анын башка мүлктөрү, ошондой эле кылмыш жолу менен алынган каражаттарды легалдаштырууга катышкан адамдардын чөйрөсү түзүлүп жатат.
Баш тамгалар А.М.А. депутат Аманкулов Марат Аскеровичке ырастады.
2008-жылы Бишкек шаардык кеңешинин депутаты болуп шайланган. 2011-2012-жылдары Мамлекеттик мүлктү башкаруу фондун жетектеген.
2012-жылы кайрадан шаардык кеңештин депутаты, 2015-жылы ЖКнын депутаты болуп шайланган.
Пикирлер (3)