Улуттук банк эсептик ченди 13% деңгээлинде сактап калды

Улуттук банк эсептик ченди 13% деңгээлинде калтыруу чечимин кабыл алды. Бул тууралуу бүгүн, 29-августта көзөмөл органынын байланыш жана эл аралык кызматташуу бөлүмүнүн башчысынын орун басары Ильичбек Султанкулов билдирди.

Анын айтымында, чечим бир күн мурун, 28-августта кабыл алынган.

«Чечим ички инфляциялык процесстерди андан ары басаңдатат жана орто мөөнөттүү келечекте инфляциянын 5-7% деңгээлинде максаттуу көрсөткүчтөргө жетишет», - деди ал.

Султанкулов кошумчалагандай, 2023-жылдын августунда инфляция жылдык мааниде 9,4%ды, ал эми жыл башынан бери 5,3%ды түзгөн.

Ошону менен бирге, анын айтымында, жакынкы жана орто мөөнөттүү келечекте инфляциялык тобокелдиктер сакталууда.