Жогорку Кеңештин комитети “Чет элдик агенттер жөнүндө” мыйзам долбоорун биринчи окууда кабыл алды

Жогорку Кеңештин Мыйзамдуулук, укук тартиби, кылмыштуулук менен күрөшүү жана коррупцияга каршы аракеттенүү боюнча комитети 3-октябрдагы жыйынында “Айрым мыйзам актыларына (Коммерциялык эмес уюмдар жөнүндө жана Кылмыш-жаза кодексине) өзгөртүүлөрдү киргизүү жөнүндө” (чет элдик агенттер жөнүндө мыйзам долбоору) мыйзамдын долбоорун биринчи окууда карап, жактырды.

Депутат Надира Нарматова Жогорку Кеңештин комитетинин мүчөлөрүнө анын пикиринде, коммерциялык эмес уюмдардын ишмердүүлүгү тууралуу видеотасма көрсөттү. Мыйзам долбоору Жогорку Кеңештин Конституциялык мыйзамдар боюнча комитетинин кароосуна жөнөтүлдү.

Мыйзам долбоору, авторлордун айтымында, коммерциялык эмес уюмдардын, анын ичинде чет өлкөлүк коммерциялык эмес уюмдардын түзүмдүк бөлүмдөрүнүн, ошондой эле чет өлкөлүк уюмдун функцияларын аткарган коммерциялык эмес уюмдардын ишинин ачыктыгын жана маалымдуулугун камсыз кылуу максатында иштелип чыккан.

Бүгүнкү күндө Юстиция министрлигинин маалыматы боюнча, Бишкекте эле 18 500 ар кандай коммерциялык эмес уюмдар катталган.

Демилгечилер белгилегендей, “Коммерциялык эмес уюмдар жөнүндө” мыйзамда “чет элдик коммерциялык эмес уюм” түшүнүгү жана бул уюмдардын ишмердүүлүгү кайсы органдар аркылуу жүргүзүлөрү ачыкталган эмес.