Жогорку Сот Дамир Мусакеевдин ишин кайра кароого жөнөттү

Бүгүн, 9-декабрда Жогорку сот Мамлекеттик күзөт кызматынын мурдагы башчысы  Дамир Мусакеевге карата эки инстанциянын өкүмүн жокко чыгарды.

Кылмыш иши соттун башка курамы менен Свердлов райондук сотуна кайра кароого жөнөтүлдү.

Мусакеевге 2016-2017-жылдары УКМКнын 9-кызматынын башчысы болуп, кезек күткөндөрдүн акыркы орундарында турган адамдарга, тактап айтканда, өзүнө жакын кызматкерлерге мыйзамсыз түрдө 15 кызматтык батирди бөлүштүрүп берген деген айып тагылган.

2019-жылдын 24-майында Бишкек шаарынын Свердлов райондук соту Мусакеевди 5 жылга эркинен ажыратып, мамлекеттик киреше катары 70 миң сом айып пул салган. 2019-жылы күзүндө Бишкек шаардык соту өкүмдү күчүндө калтырган.

Дамир Мусакеев Алмазбек Атамбаевдин бир нече жыл президенттик кызматында турган мезгилинде анын жеке жан сакчысы болгону менен белгилүү.