Өмүрбек Бакировдун мандат маселеси эмне себептен козголду?

Жогорку Кеңештин депутаты Өмүрбек Бакиров аны мандатынан ажыратуу аракети болуп жатканын   билдирди.

Эл өкүлүнүн айтымында, шайлоо учурундагы атаандашы Равшан Рыспаев "добуш сатып алган" деп мурда жабылган ишти кайрадан кароо үчүн сотко арыз жазган. Бишкек шаардык административдик соту кечээ, 12-декабрда, анын даттануусун канааттандырган.

"Мурдагы оппонентим шайлоо кезиндеги даттануулар толук каралбаганын айтып арыз жазыптыр. Шайлоо мыйзамдары боюнча кандай гана даттануу болбосун үч күндүн ичинде каралышы керек. Бирок административдик сот бир жылдан кийин "кайра карап чыксын" деген чечим кабыл алыптыр. Муну менен бардык депутаттарга "сени бир жылдан кийин деле бирөөнү арыз жаздырып туруп мандатыңды алып коёбуз" деген коркунуч жаралып калды. Жалпы эле парламентке болгон коркунуч", — деди Бакиров.

Депутат атаандашы шайлоо учурунда дагы арызданганын, бирок анда үч станцияга чейин жетип, Жогорку Сот акыркы чекитти койгонун белгиледи.

"Сотто добуш сатып алуу далилденген эмес. Ошонун негизинде БШК мага мандат берген. Кыргызстандын тарыхында мындай болбогон. Сот мыйзам чегинде эмес, буйруктун негизинде эле чечим кабыл алды деп ойлойм. Буйрук ар тараптан болушу мүмкүн. Бул соңку окуяларга байланыштуу экенин мен эле эмес эл да билип жатпайбы. Андан башка эч кандай себеп жок. Мандатты алып коюу бир-эки адамдын иши эмес, жалпы эл шайлаган депутаттын мандатын алууга эч кимдин укугу жок", — деди эл өкүлү.

Бакиров учурда адвокат жалдап, өз укуктарын коргоого киришкенин кошумчалады.