"Дордой" клубу АФК Кубогунун тайпалык баскычындагы алгачкы беттешинде түркмөнстандык "Копетдаг" клубуна жеңилип калды. Бул тууралуу Кыргыз футбол союзу маалымдады.
"F" тайпасындагы эки команданын оюну кечээ, 27-июнда Бишкекте жайгашкан Дөлөн Өмүрзаков атындагы "Спартак" стадионунда болуп өттү. Беттеш 0:1 эсебинде түркмөнстандык команданын жеңиши менен аяктады.
Оюндагы жалгыз голду 45-мүнөттө Батыргылыч Бердиев киргизди. "Дордой" эми 30-июнь күнү Тажикстандын "Худжанд" клубуна каршы оюн өткөрөт. "Худжанд" алгачкы беттешинде "Копетдаг" менен кез келип, 3:1 эсебинде жеңишти камсыздаган.
Кечээ ошондой эле Тажикстандын Дүйшөмбү шаарында өтүп жаткан "Е" тайпасындагы оюндардын алкагында кыргызстандык "Нефтчи" клубу дагы бир түркмөнстандык команда "Алтын-Асыр" менен беттеш өткөрүп, 1:0 эсебинде жеңишти алдырып жиберди. Муну менен алар тайпалык баскычтагы оюндарын жыйынтыктады.
Нурбек Жолдошов башкы машыктыруучулук кылган "Нефтчи" клубу алгачкы айлампада өзбекстандык "Согдиана" клубуна 2:0 эсебинде утулуп калган.
Белгилей кетсек, АФК Кубогу Азия футболунда беделдүүлүгү жагынан экинчи орунда турган клубдар аралык ири турнир. Мелдештин тайпалык баскычында 32 команда 8 тайпага бөлүнүп оюн көрсөтөт. Ар бир тайпадан эң мыкты эки команда суурулуп чыгып, плей-офф баскычына жолдомо алат.
Пикирлер (0)
Пикир жок. Сиз биринчилерден болушуңуз мүмкүн