19-ноябрдан бери дайынсыз болуп жаткан 9 жаштагы Сумаянын денеси табылды

Сузак районунда окууга кеткен бойдон дайынсыз болуп жаткан 9 жаштагы Сумаянын жансыз денеси табылды. Бул тууралуу Жалал-Абад ОИИБдин басма сөз кызматы билдирди.

Маалым болгондой, 27-ноябрда болжол менен саат 17:00 чамасында Сузак райондук милиция бөлүмүнө жергиликтүү тургундар тарабынан телефон чалуу болуп, ошол эле райондун Арал айылындагы Көк-Арт суусу аккан чоң сайдын жээгинен болжол менен 8-12 жаштардагы кыздын жансыз денеси табылгандыгы кабарлаган.

Жерине Сузак РИИБдин жетекчилиги жана тергөө-ыкчам тобу барышкан. Жансыз денеге сырттан кароо жүргүзүлүп, эч кандай жаракаттар аныкталган эмес. Анын өздүгү такталып, Сумая Хосилжанова экендиги белгилүү болгон.

Бул факт Сузак РИИБ тарабынан Кылмыштардын жана жоруктардын бирдиктүү реестрине табылган өлүк болуп катталып, сотко чейинки өндүрүш иши ачылып, тиешелүү экспертизалар дайындалды.

Учурда тергөө кызматы тарабынан текшерүү иштери жүргүзүлүп жатат.

2021-жылдын 19-ноябрь күнү Сузак районунун 2012-жылы туулган тургуну Хосилжанова Сумая Уткирбековна 18-ноябрда саат 12:40 чамасында мектепке кеткен бойдон дайынсыз болуп жатканы тууралуу маалымат таратылган.

Сумаяны табуу үчүн Сузак РИИБдин кызматкерлери жергиликтүү 100дөн ашуун тургундар менен биргеликте издөө иштерин жүргүзгөн.

Булак: "Турмуш"