4 млн сомго Жогорку Кеңештин жаңы сайты иштелип чыгат

Жогорку Кеңеш жаңы сайтты иштеп чыгуу чечимин кабыл алды. Бул тууралуу мамлекеттик сатып алуулар порталында маалымдалды.

Маалыматка ылайык, бул максаттарга 4 миллион сом сарптоо пландалууда.

Техникалык тапшырмада веб-порталды модернизациялоонун максаттары Жогорку Кеңештин ишмердүүлүгү жөнүндө маалыматтын көлөмүн көбөйтүү, ачык-айкындуулукту, жеткиликтүүлүктү жогорулатуу, ошондой эле жарандык коом менен кайра байланыш системасын жана башка модулдук инструменттерди киргизүү экендиги белгиленген.

Веб-портал колдонуучуларга парламент, Жогорку Кеңештин жана анын аппаратынын иши, жаңылыктары жана окуялары жөнүндө маалыматтарды алууга, жаңылыктарды жөнөтүүгө, парламенттин жыйындарынын, анын ичинде комитеттердин, фракциялардын жана башкалардын уктурууларын көрсөтүүгө мүмкүнчүлүк түзүүгө тийиш.