Кыргызстан мусулмандарынын Аалымдар кеңеши бүгүн, 11-февралда кезексиз жыйын өткөрүп, муфтий Максатбек Токтомушевдин кызматтан кетүү тууралуу арызын карап, канааттандырды. Бул тууралуу “Азаттык” радиосуна кеңештин төрагасы Абибилла Кадырбердиев билдирди.
Кадырбердиев Улуттук коопсуздук боюнча мамлекеттик комитеттин муфтияттагы каржылык боюнча мыйзам бузуулар тууралуу айыптоосуна байланыштуу маселе каралбаганын билдирди.
“Ал жөнүндө Аалымдар кеңешинин эч кандай маалыматы жок. Себеби ал иштер банкта болгон. Банкка кирүү укугу муфтий менен муфтияттын башкы эсепчисинде гана болгон. Башка эч кимде кабар жок. Борбордук текшерүү комиссиясы өзүнүн актын берди. Ал муфтияттын банктан сырткаркы каржы иштери боюнча отчету”, - деди.
Бүгүнкү жыйында Аалымдар кеңешинин кезектеги курултайын 5-апрелде өткөрүү тууралуу чечими кабыл алынды.
Пикирлер (1)