Ак-Талаада "Плодородие" ишканасынын 2,17 гектар жер тилкеси мамлекетке кайтарылды

Ак-Талаа районундагы мурдагы чарбалар аралык "Плодородие" ишканасынын 2,17 гектар жер тилкеси мамлекетке кайтарылды. Бул тууралуу Улуттук коопсуздук мамлекеттик комитетинен билдиришти. 

Атайын кызматтан билдиришкендей, "Плодородие" чарбалар аралык ишканасы 1979-жылы аймакты айыл чарба азыктары, сырьёлорду өндүрүү жана кайра иштетүү менен камсыз кылуу үчүн түзүлгөн.

Ошол эле жылы, Ак-Талаа районунун Эл депутаттар Кеңешинин аткаруу комитетинин чечими менен "Плодородие" чарбалар аралык ишканасына Ак-Талаа районунун Кайыңды-Булак айылында өндүрүштүк жана маданий-тиричилик объекттерин куруу үчүн 2,17 га жер тилкеси бөлүнүп берилген. 

1993-жылы чарбалар аралык "Плодородие" ишканасы "Камкор" ачык акционердик коому (ААК) болуп кайра түзүлүп, анын жетекчиси болуп К.З. шайланган. 

2007-жылы "Камкор" ААК документтерди жасалмалоо жолу менен жоюлуп, "Ак-Талаа-Камкор" деп кайра аталгандан кийин К.З. курулуштары жана 2,17 га аянты бар бул ишкананы Т.Б. аттуу жеке тарапка өткөрүп бергендиги аныкталган. 

2014-жылы "Кадастр" мамлекеттик ишканасынын Ак-Талаа филиалы тарабынан Н.Т. атынан жеке менчик укугу жөнүндө мамлекеттик акт мыйзамсыз берилген.

Бул объект тиешелүү кабыл алуу-өткөрүү актысына ылайык Ак-Талаа районунун Баетов айыл аймагынын балансына өткөрүлүп берилди.