Акылбек Жапаров "Мир" карталарын тейлөөнүн токтотулушу боюнча түшүндүрмө берди

Кыргызстандын Банктар аралык процессинг борбору үстүбүздөгү жылдын апрелинде өлкөдө россиялык “Мир” карталарын тейлөө токтотулгандыгын кабарлады. Буга АКШнын Каржы министрлигинин Россияга каршы киргизген экономикалык санкциясы себеп болгондугу айтылууда. Кыргызстандын банк системасында, дегеле эл аралык акча которууларды жүргүзүүдө “Мир” картасынын орду канчалык маанилүү эле? Министрлер кабинетинин төрагасы – президенттин администрациясынын башчысы Акылбек Жапаров "Кабарга" берген маегинде “Мир" карталарын тейлөөнүн токтотулушу боюнча түшүндүрмө берди.

— Биринчиден, биз эч кандай санкциядан коркпойбуз. Жашоо санкция менен деле улана берет.

Экинчиден, санкция киргизгенге негиз да жок.

Үчүнчүдөн, “Мир” картасын биз токтоткон жокпуз. Биз тейлөө токтотулгандан кийин билип калдык. Себеби МПЦ Өкмөткө карабайт. МПЦны ( Банктар аралык процессинг борбору - ред.) коммерциялык банктар көзөмөлдөйт. Улуттук банкты да угушпайт экен. Коммерциялык банктар МПЦнын 54 пайыздан көбүнө кожоюндук кылышат экен. Балким ошол коммерциялык банктар санкцияга түшүп калбайлы деп чочулашса керек деп ойлойм.

— Өлкөбүздүн банк системасында, эл аралык акча которууларды жүргүзүүдө “Мир” картасынын орду канчалык маанилүү эле?

— “Мир” картасы көбүнчө россиялыктарга эмес, бизге пайда алып келет эле. “Мир” картасын өчүргөн үчүн Россиянын кылы да кыйшайбайт. “Мир” картасы иштеп турганы бизге көбүрөөк керек эле. Мейли эми өчүрсө өчүрүптүр да деп башка жолдорун караштырып жатабыз. МПЦ өкмөт менен макулдашып койсоңор болмок деп жатабыз. Себеби Россияда биздин бир миллиондон ашуун жарандарыбыз бар. Алардын баары “Мир” картасын колдонушчу. Россия тараптан да 3 жылдан бери Кыргызстанга өзүңөрдүн баңкынарды ачкыла же чоң бир банкыңардын филиалын ачып бергиле деп суранып келе жатабыз. Макул деп эле келе жатышат, бирок эмдигиче ачылбай жатат. Жай иштешеби же ачкылары келбей жатышабы билбейм. Эң жок дегенде бир банкынын филиалын ачып коюшса биз үчүн жакшы болот эле.