AZAL учагынын кыйрашын иликтөөнүн алкагында адистер техникалык экспертиза жүргүзүүдө жана бийлик алардын жыйынтыгын күтүп жатканын Казакстандын транспорт министринин орун басары Талгат Ластаев билдирди.
«Азыр экспертизанын мөөнөтү бар, бул убакытты талап кылат... Азыр алардын жыйынтыгын күтүп жатабыз», - деди Ластаев.
Ал кошумчалагандай, авиакырсыктын чоо-жайын иликтеген ар кайсы өлкөнүн эксперттери бири-бири менен дайыма байланышта. Ластаевдин белгилешинче, Казакстандын Транспорт министрлиги AZAL авиакырсыгы боюнча алдын ала отчетто айтылгандан ашыкча комментарий бере албайт. Ал 2025-жылдын аягына чейин күтүлүп жаткан учак кырсыгын иликтеген комиссиянын жыйынтыктоочу отчетун күтүүнү суранды.
"Мен бул иштин алкагында эч кандай сыр жок деп ойлойм. Бул кырсык боюнча иликтөө жүргүзүүгө жооптуу өлкө катары биз объективдүүлүктү жана ачыктыкты биринчи планга коюп жатабыз. Тергөөнүн негизги принциптери мына ушул. Биринчи кезекте мындай жагдайлар келечекте кайталанбашы үчүн", - деп белгиледи Казакстандын транспорт министринин орун басары.
Эске салсак, 2024-жылдын 25-декабрында эртең менен Бакудан Грозныйга учуп келе жаткан Азербайжан аба жолдорунун (AZAL) Embraer 190 учагы Казакстандын батышындагы Актау шаарына жакын жерде кулап түшкөн. Авиакомпаниянын маалыматы боюнча, учакта 62 жүргүнчү жана беш экипаж мүчөсү болгон. Казакстандын Өзгөчө кырдаалдар министрлигинин маалыматы боюнча, 29 адам аман калган. Орусия элчилигинин маалыматы боюнча, алардын тогузу орусиялыктар. Жалпысынан тизме боюнча учакта 16 орус жараны болгон.
Пикирлер (0)
Пикир жок. Сиз биринчилерден болушуңуз мүмкүн