Алайда тоонун үстүндөгү кар ээрип, турак үйлөргө суу кирген

Кечээ, 13-мартта саат 16:07 чамасында Алай районунун Кызыл-Ой айылындагы тоонун үстүндөгү кар ээрип түшкөн.

Өзгөчө кырдаалдар министрлигинен билдиришкендей, анын кесепетинен тоонун боорунан 8 турак үйгө суу агып, жер көчкү коркунучу активдешип, тоонун бетинде жаракалар пайда болгондугу тууралуу маалымат түшкөн.

Мындан улам, жерине ӨКМдин Алай райондук ӨКБдан ыкчам топ тартылып, тактоо иштерин жүргүзүшүп жогоруда аталган үй тургундары туугандарыныкына убактылуу көчүрүлгөн.

Эске салсак, буга чейин аталган аймак жер көчкү коркунучу бар деп аныкталып, жалпы 15 турак үйдүн жашоочуларына кооптуу аймак экендиги тууралуу корутунду берилип, түшүндүрүү иштери жүргүзүлгөн.

Белгилей кетсек, 5 турак үйдүн ээлерине мамлекет тарабынан жер тилкелери берилип, Алай райондук ӨКБ тарабынан эскертмелер берилип келген.

"Бүгүн КР ӨКМнин алдындагы Мониторинг жүргүзүү жана божомолдоо департаментинин адистери жерине тартылып, изилдөө иштери жүргүзүлөт",-деп айтылат маалыматта.