Бишкектин Ленин райондук ички иштер башкармалыгы январь айында Алматыда тополоң учурунда кармалган музыкант Викрам Рузахуновдун ишин иликтөөнү аяктады. Бул тууралуу борбор калаанын ички иштер башкы башкармалыгы билдирди.
Милиция музыкант менен анын жактоочусун кылмыш ишинин материалдары менен тааныштырганы айтылат.
«Адистер менин ден соолугума оор залал келтиргенин аныкташкан. Кыргызстандын Башкы прокуратурасы аркылуу чогултулган материалдар Казакстандын компетенттүү органдарына күнөөлүүлөрдү аныктоо жана жоопкерчиликке тартуу үчүн жөнөтүлөт», — деп билдирди музыкант өзүнүн Facebook баракчасында.
Эске салсак, январдын башында Алматы шаарында 200 долларга башаламадыкка катышуу үчүн чет өлкөдөн келген жаран кармалды делген тасма тараган. Ал маалыматтагы киши Бишкектен келген джаз оркестринин жетекчиси Викрам Рузахунов экени аныкталган. Музыкант 10-январда гана Кыргызстанга алынып келинген.
Кыргызстандын жарандары Чолпонбек Сыдыков менен Викрам Рузахуновдун кармалышы жана катаал мамиле жасоо фактысы боюнча кылмыш иши козголуп, тергөө амалдары жүрүп жатат.
Пикирлер (0)
Пикир жок. Сиз биринчилерден болушуңуз мүмкүн