"Бир Бол" партиясынын лидери, Жогорку Кеңештин депутаты Алтынбек Сулайманов 11-апрелдеги жергиликтүү кеңештерге шайлоо мыйзам бузуу менен өттү деп билдирди.
Фейсбуктагы баракчасында ал өткөн шайлоолордон сабак болбогонун жазган. Бул тууралуу “Азаттыкка” берген маегинде саясатчы шайлоо мыйзамдарын өзгөртүү керек деген пикирин билдирди.
"Бул шайлоолордун өткөндөн айырмасы жок. Ошол эле административдик ресурс колдонулган, добуштарды сатып алуу болду. Бийликтин жана акчанын жардамы менен жеңишке жетишишти. Биз мыйзамдарыбызды түп-тамырынан өзгөртүшүбүз керек", - деп белгиледи Алтынбек Сулайманов, мыйзам бузууларга бийлик дагы, жарандар дагы күнөөлүү экендигин кошумчалоо менен.
Эске салсак, "Бир Бол" партиясы Ош шаардык кеңешине шайлоого катышкан, бирок алдын-ала маалыматтар боюнча, ал минималдык босогону ашып, 7% добуш ала алган эмес. Бул партия, ошондой эле "Улуттар Биримдиги", "Республика", "Бүтүн Кыргызстан", "Ишеним" жана "Улуу Журт" партиялары түштүк борбордогу добуш берүүнүн жыйынтыктарын тааныбайбыз деп билдиришти жана аларды жокко чыгарууну талап кылышты, анткени алар шайлоо "ыплас" өттү деп эсептешүүдө.
Пикирлер (0)
Пикир жок. Сиз биринчилерден болушуңуз мүмкүн