Саламаттыкты сактоо министри Сабиржан Абдикаримов кызматынан кеткен жок. Бул тууралуу 27-июлда Республикалык ден соолукту бекемдөө жана массалык коммуникация борборунан билдиришти.
"Учурда саламаттыкты сактоо министри болуп Сабиржан Абдикаримов эсептелинет, ал ооруп жаткандыгына байланыштуу дарыланууда", - деп маалымдалды.
Ал эми “Медиа центр” мультимедиалык-маалымат агенттигине Саламаттыкты сактоо министрлигинин басма сөз кызматынан азырынча аларга бул боюнча эч нерсе белгисиз экенин айтышты.
Белгилей кетсек, ЖМКлардын биринде Сабиржан Абдикаримов өз каалоосу менен кызматынан кеткени жана анын ордуна Милдеттүү камсыздандыруу фондунун жетекчиси Эльнура Боронбаева дайындалганы маалымдалган.
Саламаттыкты сактоо министрлиги 10-июлда маалымдагандай, министр С.Абдикаримов пневмония оорусуна чалдыгып, республикалык жугуштуу оорулар ооруканасында дарыланып жаткан.
Пикирлер (0)
Пикир жок. Сиз биринчилерден болушуңуз мүмкүн