Айтматов проспектиси чет элдик делегациялардын сапарларына даярдыктын алкагында кеңейтилүүдө, – Туманбаев

Бишкектеги Чыңгыз Айтматов проспектиси президенттин тапшырмасы менен алдыдагы чет элдик делегациялардын сапарларына даярдыктын алкагында 6 тилкелүү болуп кеңейтилүүдө. Бул тууралуу президенттин Иш башкармалыгынын башчысы Каныбек Туманбаев журналисттердин суроолоруна жооп берип жатып билдирди. 

Анын айтымында, Ч. Айтматов проспектисинин аталган бөлүгүн 4,5 метрге кеңейтүүгө толук мүмкүнчүлүк бар. 

“Белгилүү болгондой, “Ынтымак Ордо” курулду. Бул жол стратегиялык трасса. Быйыл өлкөбүзгө көптөгөн делегациялар келет. Ал эми кийинки жылы дүйнөнүн 19 мамлекетинин президенттеринин келүүсү күтүлүүдө. Анткени, ШКУнун чоң саммити өтөт. Азыр конгресс-холлду жана конок үйлөрүн куруп жатабыз”,- деди Туманбаев.

Ошондой эле конгресс-холлдун жанында сейил бак, проспекттин эки четинде жөө адамдар үчүн жол, самокаттар, велосипеддер үчүн атайын тилкелер жана жашыл зона болору айтылды. 

Эскерте кетсек, Ч. Айтматов проспектисинин И. Ахунбаев көчөсүнөн Семетей көчөсүнө чейинки 4 км 400 метр жол тилкеси оңдоо иштерине байланыштуу 17-мартта эки тараптуу жабылган. Проспектти кеңейтүүдө көчөнүн бир тарабындагы кызыл тилкеден өтүп кеткен жеке үйлөрдүн тосмолору алынары маалымдалган.