Азиза Абдурасулованы Садыр Жапаровдун кайсы сөзү кубандырды?

Президент Садыр Жапаровдун 28-январда өткөн инаугурацияда сүйлөгөн сөзү коомчулукта ар кандай талкууланып жатат. Белгилүү укук коргоочу Азиза Абдурасулова “Азаттык” үналгысына берген маегинде Жапаровдун “Кыргызстанда бөлүнүп-жарылган эмес, бирдиктүү улут жараткым келет” деген сөзү кубандырганын билдирген.

“Садыр Жапаров үч нерсеге басым кылды. Биринчиси - тышкы саясат боюнча “Кошуна өлкөлөр менен жакшы мамиледе болобуз” деди. Экинчиси – “Экономиканы көтөрөм, тышта жүргөн мигранттарды алып келем” деп убада берди. Андан кийин улут аралык мамилени жакшыртуу боюнча сүйлөдү. Ошол сөздөрүнүн арасында адам укуктары тууралуу да бир аз токтолду. Мени эң негизгиси “Кыргызстанда бөлүнүп-жарылган эмес, бирдиктүү улут жараткым келет” дегени кубандырды. Кыргыз, орус, татар дебей кыргызстандыкмын дегенде гана өнүгөбүз”, - деген ал.