Бактыбек Чойбеков, ЖК депутаты: “Айыл чарба министрлиги тарабынан анализ жок”

- Бактыбек мырза, азыр эле айлык акылардын аздыгы тууралуу маселе көтөргөндө сиз айыл өкмөтүндө иштегендер тууралуу айттыңызбы?

- Кеп жалпы билим берүү, саламаттыкты сактоо тармагындагы техникалык персонал жөнүндө болуп жатат. Биздин апаларыбыз, эжелерибиз пол жууп, офистерди тазалап жүрбөйбү, ошолордун айлыктары 6-7 миң сом эле. Жумуш оор, бирок тазалыкты баарыбыз талап кылабыз. Айлыктын аздыгынан көбү бир ай иштеп, кетип калышат экен. Натыйжада, кадрлар дайыма таңкыс. Ошондуктан, алардын айлыгын көтөрүү зарыл. Абал региондордо, мектептерде, ооруканаларда, бала бакчаларда өзгөчө курч. Бизге каттар менен көп кайрылып жытышат. Жаңы шайланган жергиликтүү кеңештин депутаттары да ар бир жолугушууда ушул маселени көтөрүшөт.

- Мына жаз келди, бирок сиз айткандай дыйкандардын көбү эмне эгип-тигээрди билбей турушат го?

- Эң туура. Айыл чарба министрлиги тарабынан анализ жок болуп атпайбы. Дыйкандарыбыз эмнени эгүүнү билбей, башаламан тигишет. Быйыл картошканын баасы аябай кымбат болуп, 60-70 сомго чейин чыкты. Анан дыйкандардын баары азыр картошка тигип алышып, эртең баа түшүп кетсе, өзүн өзү актабай калат. Бул багытта министрлик иш алпарыш керек да. Бир жарым миң, эки миң киши иштейби, так эсимде жок, килейген министрликти кармап атпайбызбы. Ошолордун баарынын конкреттүү иши жок, статистика менен отурушат...     

Булак: "Азия Ньюс" гезити