Бардык айып санкциялары кыскарат. ККМди киргизүү боюнча жумушчу топ өз ишин аяктады

Министрлер кабинетинин төрагасы Акылбек Жапаров чакан жана орто бизнеске контролдук-кассалык машиналарды киргизүү жана электрондук жарык-фактураларды берүүнү камсыздоо шарттарын талкуулоо жана иштеп чыгуу боюнча жумушчу топтун кеңешмесин өткөрдү.

Министрлер кабинетинин башчысы маалымдагандай, биргелешкен аракеттердин аркасында кассалык машиналарды ыңгайлуу ишке киргизүү үчүн ыкмалар жана шарттар иштелип чыккан.

«Тиешелүү мамлекеттик органдардын кызматкерлери жана ишкерлер тараптан да жемиштүү иштер аткарылды. Бул иштердин натыйжасында бизде белгилуу натыйжалар бар. Айрым учурларда бизнестин пикирине макул болуп, башка талаштуу маселелер боюнча ишкерлер биздин пикирди укту. Биз компромисс таба алдык жана бул – эң башкысы. Ишкердин жылдык жүгүртүүсү 8 млн сомго жетпесе, салык төлөөдөн бошотуу чечими кабыл алынды. Эгерде жүгүртүүсү бул көрсөткүчтөн ашып кетсе, салык 0,5%, же 1% гана болот. Бардык айып санкциялары кыскартуу жагына карай кайра каралат. Кийинки чечим бизнеске контролдук-кассалык машиналарды жана тиешелүү буюмдарды, анын ичинде атайын кагаз лентасын жана принтерди сатып алууга жардам берүү болду. Биз ар бир ишкерге, анын ичинде аймактардан келгендерге да кассалык машиналар менен иштөөнү үйрөтүүгө даярбыз. Ошондой эле салык органдарынын өкүлдөрү менен жолугушуу болот. Эгерде алардын бирөө эреже бузса, же ишкерлерге орой мамиле кылса, коркутуп-үркүтсө, бул кызматкер кайра кызмат ордуна калыбына келтирилбестен терс себептер менен дароо жумуштан бошотулат», - деп белгиледи министрлер кабинетинин башчысы.

Акылбек Жапаров жумушчу топтун алкагында башталган иштерди улантуу зарылдыгын белгиледи.

«Мага сиздердин жардамыңыздар керек. Салык органдарынын мыйзамсыз аракеттери жөнүндө мага билдириңиздер. Ал үчүн whatsapp тобун түзүп, ага мени кошсоңуздар болот. Мен сиздердин өлкөнүн экономикасын көмүскөдөн алып чыгууга болгон даярдыгыңыздарды жана каалооңуздарды көрүп турам. Мен муну абдан баалайм жана бул абалдан чыгуунун жолун табууга жардам бергендердин бардыгына ыраазымын», — деди Министрлер Кабинетинин Төрагасы.

Акылбек Жапаров кошумчалагандай, контролдук-кассалык машиналарды камсыздоо боюнча ай сайын төлөнчү наркы каралат. «Бул 300 сомдун чегинде болот жана биз ошондой эле мүмкүн болушунча отчеттуулукту жөнөкөйлөштүрөбүз. Милдеттүү бойдон калган бир гана нерсе - бул контролдук-кассалык машиналарды жана эсеп-фактураларды колдонуу. Ушул эки инструмент аркылуу биз төлөм төлөбөгөндөргө чыгып, экономиканы мыйзамдуу талаага алып чыгабыз», - деп белгиледи Министрлер Кабинетинин башчысы.

Өз кезегинде ишкерлердин курамынан түзүлгөн жумушчу топтун өкүлдөрү компромисс табууга даяр болгон бийликтин аракеттерине канааттангандыктарын билдиришти.

«Өлкө бийлиги контролдук-кассалык аппарат сыяктуу инструменттерди ишке киргизүүдө карапайым элдин үнүн угуп, маселени басып койбогону абдан маанилүү. Сунушталган сын-пикирлердин 80% кабыл алынды, демек бул жалпы тил табышуу болгондугунан кабар берет. Контролдук-кассалык машиналарды ишке киргизүү маселеси бизди мынчалык бириктирет деп эч ким ойлогон эмес», - деп белгилешти ишкерлер.

Акылбек Жапаров өз кезегинде бул этаптагы иштер аяктап калгандыгын жана жакынкы арада президенттин Жарлыгынын долбоору даярдалып, ал дагы жумушчу топтун мүчөлөрү менен макулдашыла турганын белгиледи. «Биздин чоң пландарыбыз бар. Сооданы каржылоону өнүктүрөбүз, кампа запастарына төмөн пайыздык кредиттерди берүү боюнча мамлекеттик банктардын долбоорлору даярдалууда. Эң негизгиси, салык төлөөдөн качууга аракет кылган бизнесмендердин колундагы курал болуп калбашыңар керек», - деп жыйынтыктады Акылбек Жапаров.

Белгилей кетсек, контролдук-кассалык машиналарды милдеттүү түрдө ишке киргизүүгө каршы чыккан чакан жана орто бизнестин, анын ичинде аймактардан келген ишкерлердин митингдеринен кийин ишкерлерден жана тиешелүү мамлекеттик органдардын кызматкерлеринен турган жумушчу топ түзүлгөн.