Утурумдук бийлик саясий ачкөздүккө эч барбашы керек эле.
"Укук талаасынан чыкпастан аракет кылабыз" деген убада сөз утурумдук бийлик тарабынан улам жаңы бир кадам аркылуу бырын-чырын түшүп жатканын жарандык коом, айдыңдар, калайык даана көрүп турат.
Мен Адахан инимдин "Азаттыкка" курган соңку маегинин мазмунун толук колдойм.
Албетте, мен парламенттик нагыз башкарууга караандай элекпиз, өлкөдө ошол багытты тереңдетиш керек, болочокку президентти ал түгүл Жогорку Кеңеш эле шайлап коюшу керек, аткаруу бийлиги толук өкмөт башчыга берилиши зарыл, көп партиялуу системаны чыңдоо абзел, деп санайм.
Адахан иним күчтүү президенттик бийликти жактайт.
Мындай талаш-тартыштуу жолдорду талкуулап, элге жаккан бүтүмгө келүү - келээрки жаңы чакырылыштагы Жогорку Кеңештин учурунда гана башат алчу конституциялык реформа маалында жалпы эл тарабынан атаандаш Башмыйзам долбоорлорунун бирин тандоо аркылуу чечилчү иш.
Мындай тандоо сөзсүз болот, бирок азыркы чакырылыштагы, мөөнөтү бүтүп калган Жогорку Кеңештин тушунда эмес, жаңы шайлана турган Жогорку Кеңештин чакырылышынын тушунда, келээрки жылдан тартып ачык-айкын жүргүзүлүүгө тийиш.
Азыркы тапта 2020-жылдын 20-декабрына БШК тарабынан белгиленген парламенттик шайлоону таза, калыс өткөрүүгө шарт түзүү - утурумдук бийликтин бирден-бир парызы.
Башмыйзамды тебелетүүгө көрмөксөн болуп койгон айрым "демократ" депутаттарга да айра-таң калып жатам. Же алар да алеки саатта жең ичинен соода жүргүзүштүбү, ж болбосо ар кыл коркутууларга кабылыштыбы? Таң калычтуу...
Ал эми Акаев, Бакиев, Атамбаев, Жээнбековго оңой эле көшөкөрлүк кылган жана эми "Садыр Нуркожоевич!" деп ийиле кошоматтанган башка депутаттарга жана аткаминерлерге айла жок, алар инерция менен эле Төлөнчө Баланчаевичтин ордуна Түкүнчө Каланчаевич деген атты гана алмаштырууга үлгүрүп, көнүмүш адатынча жаңы бийлик ээсине мурдагы усулда кулдук урууга шашылып жатышат.
Тынчтыкбек Чоротегин
Пикирлер (5)