Баткенде эрте никеге туруунун кесепеттери эскертилди

Баткен шаарында окуучуларга эрте никеге туруунун кесепеттери жөнүндө маалыматтар берилди. Бул тууралуу  Баткен ОИИБдин Басма сөз кызматынан билдиришти.

Баткен ШИИБдин милициянын балдар менен иштөө инспекциясы тарабынан Баткен шаарындагы орто мектептердин биринин жогорку класстарынын окуучулары менен жолугушуу өткөрүлдү. 

Жолугушууга вице-мэр Мансурбек Маматисаев, Баткен райондук прокурорунун жардамчысы Бактыяр Көлбаев, шаардын башкы имам хатиби, шаардык ички иштер бөлүмүнүн балдар менен иштөө инспектору Абдыгапар Садиров, социалдык кызматкерлер, билим берүү бөлүмүнүн адистери катышты.

Иш-чаранын жүрүшүндө окуучуларга коомдо орун алып жаткан көйгөйлөр боюнча маалыматтар берилди. Ошондой эле, эрте никеге туруунун кесепеттери жөнүндө кенен түшүндүрмө берилип, ар бир кадам ойлонулуп, жоопкерчилик менен жасалышы керектиги айтылды. Аны менен катар спирт ичимдиктеринин зыяндуулугу, укук бузууларды жана кылмыштуулукту болтурбоо, билим алуунун зарылдыгы боюнча кеңештер берилди. Андан соң, убакытты туура пайдалануунун пайдасы туурасында айтылып, жолугушуу суроо-жооп иретинде өткөрүлдү.