Баткенде селдин кесепеттерин жоюу иштери уланууда

Бүгүн, 12-майда Баткен облусунда кечээ жүргөн селдин кесепеттерин жоюу иштери уланууда. Бул тууралуу ӨКМнын маалымат кызматы билдирет.

Баткен районунун аймагында кечээ, 11-майда саат 18:00-19:30дарда нөшөрлөгөн жаандын кесепетинен унаа жолдорун сел каптап, айрым айылдардын чарбактарын жууп, чарбаларына зыян келтирген. 

Алсак, Ак-Сай айыл өкмөтүнүн Ош – Баткен – Раззаков унаа жолунун 265-чакырымында сел суулары унаа жолду кум-шагылга толтуруп, жол эки тараптуу жабылган. Ошондой эле Ак-Сай – Достук унаа жолунун 4-5-чакырым аралыктарында кокту-колоттон келген кум аралаш сел суулары унаа жолду каптап, жол жабылган.

Тазалоо иштерине тартылган техниканын жардамы менен Ош – Баткен – Раззаков унаа жолу саат 20:30да бир тараптуу ачылган. Ал эми Ак-Сай – Достук унаа жолунда тазалоо иштери жүргүзүлүүдө. 

Ушул эле күнү Суу-Башы айыл өкмөтүнүн Бөжөй айылында да сел жүрүп, ички чарбалык унаа жолдоруна, турак үйлөрдүн короолоруна жана эгин талааларына кирген. Ошондой эле 60 даана габион торчосун жууп кетип, 5 бодо малды агызып кеткен. 

Сел кесепеттерин жоюу максатында райондук Өзгөчө кырдаалдар бөлүмүнөн куткаруучулар жана техника тартылып, тазалоо иштери бүгүн, 12-майда жүргүзүлүп жатат.