Бишкекте Европа улутундагы адамдар курал жарактар менен кармалды

Бишкек шаарында 16-март күнү Европа улутундагы 2 адам курал жарактар менен кармалды. Бул тууралуу Ички иштер министрлигинен билдирди.

Маалыматка ылайык, 7-апрель көчөсүнөн шаар тургуну эки европа улутундагы адамды жана өспүрүмдү көрүп, биринен ок атуучу куралды байкап калгандыгын ички иштер органдарына телефон аркылуу кабарлаган.

Аталган дареке келген милиция кызматкерлери 2006-жылы туулган Л.К. аттуу өспүрүмдү кармашкан. Ал өз ыктыяры менен 1 даана бычак жана 4 даана 12-калибрдеги ок-дарыларды өткөрүп берген.

Ыкчам-иликтөөнүн жүрүшүндө шектүү катары Р.Д. жана агасы Я.М. кармалып, 98-беренеге ылайык Бишкек ШИИББдин убактылуу кармоочу жайына киргизилген.

“Маалым болгон эки дарекке кечиктирилгис тинтүү жүргүзүлүп, натыйжада 1 даана 7,62- калибрдагы “Сайга” автоматы, 3 даана РПГ-18 куралы, 3 даана граната (жардыруучу каражат), 1 даана винчестер, 5,45-калибрдагы 248 дана ок жана 1 даана 12-калибрдагы ок, 9 мм болгон 85 даана ок, 10 мм болгон 171 даана ок, 7,62 мм болгон 700 даана ок, 22 кылыч, 72 бычак, кара түстөгү 2 даана бет кап, автоматтын бир даана дикөнчөсү табылган. Андан сырткары аталган даректен 19 ширенкенин кутучасына салынган 360 грамм “гашиш” баңгизаты менен 1 килограмм 910 грамм салмактагы “марихуана” баңгизаты табылып алынган”, - деп кабарланат.

Учурда Ички иштер министрлигинин жана Бишкек ШИИББинин Криминалдык милиция кызматтарынын жана тергөө кызматтарынын кызматкерлери тарабынан атайын иликтөө иштери жүргүзүлүп жатат. 

Анда жогорудагы мыйзамсыз жүгүртүлгөн курал-жарактар менен ок-дарыларга уюшкан кылмыштуу топтордун, 2019-жылы август айында массалык баш аламандыктарды уюштургандардын, ошондой эле 2020-жылдын март айында бийликти күч менен басып алууга аракет жасаган, массалык баш аламандыктарды уюштурган адамдардын тиешеси бар жогу боюнча иликтөө жүрүп жатат.